Околу 350 полицајци биле отстранети од своите работни места во текот на ноќта во главниот град на Турција, Анкара,во најголемиот поединечен ваков случај во земјата по откривањето на корупцискиот скандал, јавува Си-Ен-Ен Турк.
Разрешени се шефови на оделенија за организиран, финансиски и дигитален криминал.
Стотици полицајци веќе беа отпуштени или добија прераспоредување низ земјата откако беше откриен големиот корупциски скандал на 17 декември минатата година. Во аферата досега се уапсени десетици луѓе, меѓу нив и познати бизнисмени, како и синови на министри во владата на исламистичката АКП, кои во меѓувреме поднесоа оставки на функциите.
Околу 250 луѓе, кои доаѓаат надвор од Анкара, биле поставени на местата на отстранетите полицајци, и тие од денеска ќе ги преземат нивните должности во контролата и регулирањето на сообраќајот, како и во локалните региони.
Премиерот Реџеп Таип Ердоган тврди дека е во прашање„нечиста и гнасна “операција против неговата влада. Акцијата ја следат улични, насилни протести и со барање за револуција за да се „исчисти корупциската нечистотија“.