Турскиот премиер Бинали Јилдирим во текот на вчерашната средба во Анкара со генералот Џозеф Дуфорд, началник на Генералштабот на армијата на САД, уште еднаш го повтори своето барање за екстрадиција на поранешниот имам Фетула Ѓулен кој живее во егзил во Америка. Истовремено, турското обвинителство во Одрин утврдило дека ЦИА и ФБИ ги обучувале следбениците на свештеникот Ѓулен, кои на 15 јули се обидоа да изведат воен удар во Турција.
Како што пишуваат медиумите во Турција, обвинителството бара максимална казна за 43 осомничени кои се поврзани со пучот, а најтешка можна казна се бара и за Ѓулен, кого турскиот претседател Реџеп Ердоган го посочи како духовен водач на пучот.
„ЦИА и ФБИ организираа тренинзи во културните центри на ѓуленистичкото движење. Операциите кои обвинителите ги направија на 17 декември пред три години се добар пример на нивното делување.“, се наведува во обвинението, со објаснување како САД ги обучил ѓуленистичките следбеници и како тие потоа се инфилтрирале во безбедносните институции.
„Тој пропаднат обид за пуч требаше да ја ослаби државата и нејзините институции и да ја урне владата. За обидот за пуч виновни се ѓуленистите кои работат во судството и во безбедносните институции, а кои ги обучуваа Американците.“, тврди обвинителството, пренесува агенцијата Анадолија.
Освен со премиерот Јилдирим, генералот Дундорф се сретна и со началникот на Генералштабот на турската армија Хулусиј Акер. Во текот на состанокот на воениот врв, Дундорф најостро го осуди обидот за пуч и истакна дека причината за неговата посета на Турција е да покаже солидарност со турскиот народ и желба за продолжување на воената соработка.
За време на средбата, генералот Дунфорд, како што јавуваат агенциите, прашал и дали Анкара има докази дека зад пучот стои Ѓулен, на што неговиот колега Акер одговорил дека всушност тој лично е доказот, затоа што за време на пучистичкиот напад на турскиот парламент, едвај извлекол жива глава.
„Ви требаат докази? Јас сум жив доказ“, му одговорил Акер на генералот Дунфорд.