Турското Министерство за одбрана потврди дека е пукано врз авион кој слета на аеродромот Вади Сеидна во Судан, но дека нема повредени, пишува Гардијан.
Министерството во објава на Твитер наведе дека било пукано во авионот за евакуација Ц-130, кој одел кон Вади Сеидна во мисија да ги евакуира нашите граѓани заглавени во Судан, каде што продолжија конфликтите.
„Нашиот авион слета безбедно. Иако нема повредени меѓу нашиот персонал, се вршат потребните проверки на нашите авиони“, се вели во соопштението.
Суданската војска, според Гардијан, претходно тврдеше дека силите за брза поддршка (РСФ) пукале во авионот, при што е повреден еден член на екипажот и оштетен авионот.
Сепак, РСФ го негираат тоа, наведувајќи дека се „цврсто посветени на хуманитарен прекин на огнот“.