Тутунарите од струмичкиот регион излегоа на протест и го блокираа магистралниот пат Струмица – Радовиш. Незадоволни од начинот на откупот на тутунот, ниската цена и како што велат, потценувачкиот однос спрема тутунот, целосно ја деградирало нивната работа и егзистенција. Тие побараа од Владата да одвои дополнителни 30 денари за килограм тутун, со што субвенцијата од 60 денари би се зголемила на 90 денари. Во спротивно најавија дека ќе излезат на голем протест пред Владата во Скопје.
„ Бараме од Владата да не остане ниту еден килограм неоткупен тутун и откупот на целиот тутун да се заврши до 15-ти март 2015 година, до кога е законската можност за продадениот тутун да се добијат субвенции, рече Ристо Велков, претседател на Сојузот на синдикати на земјоделски производители.
Тутунарите побараа од Груевски да ги слушне нивните барања, бидејќи тутунот им бил единствената егзистенција.
„ Ми го проценуваат на 14 денари килограм тутун, оваа е срамота, нека слушне Груевски. Ние сме седум члена фамилија и не знаеме веќе каде да се обратиме“, вели Мухарем, тутунопроизводител од струмичко.
„ Жално е што ја будам фамилијата во 3 часот наутро да кршат тутун, а сега да немам да им дадам по некој денар за Новата година, оти тутунот не го зимаат. Моментално децата ме гледаат, инвалид сум и немам никакви приходи, вели Томе Мицев.
Тутунопроизводителите се незадоволни од односот на откупувачите бидејќи, како што велат, повеќе од половина тутун им го враќале.
„ Го носев тутунот според датумот кој што ми беше одреден и пак ми вратија 400 килограми оти не бил квалитетен. Нека дојде комисија да утврди дали не е квалитетен“, вели Ацо Михајлов од Василево.
„Имам 1000 килограми тутун, од кои само 500 килограми ми зедоа, ми кажаа тутунот имал некакви бои. Просекот ми излезе по 75 денари, целиот тутун ни стои во подрумите, ќе остане и ќе се расипе, а од друга страна бараат да плаќаме давачки, рече Кољо Мицев, тутунопроизводител од Василево.