Романскиот претседател на заминување, Трајан Басеску, се најде под притисок поради контактите на својот брат со мафијата. Мирча Басеску, брат на романскиот претседател, синоќа бил уапсен под обвинение за примање поткуп.
Според обвинителите од Националната дирекција за борба против корупција во Романија, Мирча Басеску добил сума во вредност од 250.000 евра преку посредник од уапсено лице поради обид за убиство, со цел да влијае за негово ослободување.
Лицето, за кое се тврди дека братот на шефот на романската држава требалo да влијае да не биде затворено во замена за пари, е Ангел Санду, познат како Берча Мондиал, против кого е водено дело за обид за убиство на негов роднина во 2011 година. Кон крајот на минатиот месец Мондиал добил конечна пресуда од осум години и девет месеци затвор. Берча Мондиал, кој вчера беше донесен од затворот за да даде изјава пред Националната агенција за борба против корупцијата, пред новинарите изјави дека дал два милиони евра за да побегне од затвор и дека во случајот биле вмешани претседателката на Врховниот суд Ливија Станчу и раководителката на Националната дирекција за борба против корупцијата Лаура Кодруца Ковеши.
Со солзи во очите и треперлив глас претседателот Трајан Басеску изјави дека нема да подлегне на „природниот импулс да го брани својот брат“, туку ќе се заложи за „консолидирање на судството“. Тој знаел за уценувањата на мафијашот кон неговиот брат, но во ниеден момент со Мирча Басеску не разговарал за свое вмешување во работата на судството. Претседателот изјавата ја даде од својот кабинет, а повеќе телевизиски станици ја пренесуваа во живот.
Центристичко-десниот Басеску се смета за најважниот политички поддржувач на борбата против корупцијата во Романија, а неговите напредоци ги призна и ЕУ. На претседателските избори во ноември тој не може да се кандидира по два мандати едноподруго, но планира да остане во политиката.
Извор: Дојче Веле на македонски јазик