Словенечката полиција го уапси вчера директорот и шеф на управата на Нова љубљанска банка, Јанко Меѓа под сомневање дека илегално профитирал користејќи ги инсајдерските информации дека Агрокор сака да го преземе Меркатор, објавува Јутарњи лист.
Официјално полицијата не ги открива имињата на лицата и на компаниите вклучени во скандалот, но врз основа на неофицијални информации, словенечки медиуми објавија дека станува збор токму за Меѓа, кој во 2011 Словенија го прогласи за “млад менаџер на годината”, и кој до 2012 беше член на Управниот одбор на словенечката Уникредит.
Истрагата започна по анонимна пријава во 2009 и словенечката полиција е во соработка со хрватските власти.
– Едно лице кое е осомничено за кривично дело е поранешен вработен во една од финансиски институции, кои припаѓаат на групата на банките. Осомничениот бил вклучен во група на луѓе кои вршеле банкарски и трговски активности во нашата и во соседните земји и добиле информации дека едно од трговските друштва од соседната земја планира да преземе една од комерцијалните компании во Словенија. Оваа информација, пак, влијаела на цената на хартиите од вредност кои котираат на редовниот пазар во Република Словенија.
Врз основа на овие информации, групата на банки почнала да купуваат хартии од вредност на словенечкото стопанско друштво, по пониска цена од онаа која била предвидена како цена за превземањето на стопанското друштво – изјавил криминологот Роберт Слојдер, раководител на истрагата.
Тој објасни дека е тешко да се процени финансиската корист на осомничениот, бидејќи разликата меѓу куповната и продажната цена на акциите варира, но дека тој се соочува со пет години затвор.
List Finance објавува дека сепак, според неофицијални информации, Националното биро за истраги проверува дали Сплитската банка и фондовите на хрватскиот Алијанц во име на Јанко Meѓа купувале акции на Меркатор преку старателската сметка.