Во Босна и Херцеговина во тек е голема полициска акција во која е уапсен министерот за земјоделство и вицепремиер на босанската влада, Јерко Иванковиќ Лијановиќ, неговиот брат Младен Иванковиќ Лијановиќ пратеник во Парламентот, сопственици на фабриката за месна индустрија „Лијановиќ“, како и нивниот трет брат и министерот за трговија во Владата Милорад Бахиљ.
Тие се приведени утринава под сомнение за учество во организиран криминал и даночно затајување. Во акција „Месо“ уапсени се вкупно 14 лица, меѓу кои и еден пратеник и двајца браќа на вицепремиерот Лијановиќ.
Од Обвинителството на БиХ, по чиј налог е спроведена акцијата, се дознава дека апсењата се дел од истрагата за измами со кои буџетот на Федерацијата БиХ е оштетен за околу 6 милиони евра.
Станува збор за даночни и царински затајувања извршени со основање и подоцна фиктивно затворање на претпријатија, кои оставиле големи даночни долгови.
„Утврдено е дека криминалната група со своите противзаконски активности се здобила со противправна корист во износ од 11,6 конвертибилни марки. Средствата се стекнати со прикривање данок, од ненаменски искористени субвенции за земјоделците и од продажба на стокови резерви на Федералната дирекција. За да го прикријат потеклото на парите, износот го враќале во легален оптек преку давање позајмици и откуп на акции од правни лица“, изјави Кристина Јозиќ, портпаролка на босанската агенција за истражување.
Со акцијата раководи Јавниот обвинител на БиХ, а во активностите на теренот учествуваат повеќе стотина припадници на Државната агенција за истрага и заштита (СИПА) и Управата за индиректно оданочување на БиХ.
Во акцијата се вршат претреси во три претпријатија, а меѓу осомничените има и познати имиња од стопанскиот и јавниот живот во државата, соопшти Обвинителството на БиХ.