Љубомир Костовски: Во време на социјализмот анегдотата дека еден висок функционер – чие име признавам дека сум го заборавил а засега Интернетот не помага – кој извикал „Уапсете го тој Ројтерс“ служеше како поддршка за било какви исмејување на стариот социјалистичко-бирократски однос кон медиумите. Функционерот кога дознал од радиото дека агенцијата Ројтерс објавила некаква негативна вест за Југославија скокнал од столот и побарал да се уапси агенцијата, мислејќи дека е тоа некој поединец, веројатно и државјанин на федерацијата.Потсетувањето на оваа анегдота врзана за конкретен настан (инаку не би била, нели, анегдота туку шега) стана денес актуелна кога дознав од текст објкавен на „Нели ти реков“ дека двајца новинари на Телевизија 21 и еден новинар на агенцијата „Ројтерс“, државјанин на Република Србија, вечерва се однесени и задржани во полициската станица „Центар“ бидејќи го снимале со дрон протестот на Плоштадот Македонија во Скопје. Протестот се одржа поради трагедијата во Кочани во која по пожар во дискотеката „Пулс“ загинаа 59 лица. Новинарите се задржани во полициската станица повеќе од час и половина, се вели во веста и се додава дека од Министерството за внатрешни работи потврдуваат дека неколку новинари се повикани на разговор, бидејќи, немале дозвола за снимање со дрон. Како и да се земе асоцијацијата дека се враќаме во некои давни времиња се наметнува самата. Барем за оние кои го помнат минатото.