Марија Шарапова повеќе не може да биде тенисерката од пред неколку години која жареше и палеше на тениските терени, на која се гледаше како финалистка пред секој голем турнир и која беше главна ривалка на сестрите Вилијамс на ВТА турот. Но, згодната Русинка продолжува да жари и пали на приватен план. Подолг период ужива во среќна врска со англискиот милионер Александар Гилкис.
Откако популарната Маша од Нјаган, град во западен Сибир, ја раскина венчавката со словенечкиот кошаркар со српско потекло, Саша Вујачиќ и ја прекина сериозната врска со бугарскиот колега Григор Димитров, сега е во прегратките на човекот мкој е голем вљубеник во уметноста. Заедно со група пријатели во 2010 година ја основаа аукциската куќа „Педл Ејт“ (Paddle8) која се етаблира како специјализирана за продажба на уметнички дела.
Гилкис е роден во Лондон во 1980 година. Потекнува од имотно семејство, неговиот татко е познат стоматолог, неговата мајка е професорка на престижниот Универзитет Оксфорд на кој и самиот студираше. Постојано е во друштво на британскиот џет-сет и близок пријател е со принцевите Хари и Вилијам. Голем русофил е, одлично го говори мајчиниот јазик на Шарапова и вљубеник е во руската литература.
Партнерот на Шарапова има еден брак зад себе. На 24 годишна возраст ја запозна седум години помладата Американка Миша со која 13 години беа во врска, вклучувајќи го и заедничкиот живот од 2012 година до 2016 година. Венчавката беше организирана во Венеција, а меѓу гостите имаше бројни членови на англиското кралско семејство.