Еден припадник на Еулекс изутрината бил убиен кога непознати лица отвориле оган врз возилото на мисијата на Европската унија на територијата на општина Звечан.
Директорот на Здравствениот дом во Косовска Митровица, Милан Ивановиќ потврди дека припадник на мисијата на ЕУЛЕКС во безживотна состојба бил донесен во 08:15 ова утро од страна на брзата помош од Звечан.
„Едно лице е донесено без никакви знаци на живот, но реанимацијата беше изведена, којашто не даде резултати“, рече Ивановиќ за новинската агенција Бета.
Тој додаде дека лицето имало прострелни рани во градите и десната нога, и најверојатно причина за смртта е искрварување.
„Изутрината возило на Еулекс кое се движело на магистралниот пат Приштина Лепосавиќ кај местото Балабан, општина Звечан наиде на пукање од страна на непознати лица. Притоа тешко бил ранет еден цариник од Литванија кој веднаш бил префрлен во болница во северна Митровица, каде што починал“ изјави за Радио Слободна Европа, командантот на полицијата во јужниот дел на Митровица Ергин Медиќ.
Инцидентот го потврди и Еулекс.
„Работното тело за Митровица е веднаш активирано и во тек истрага за убиството“, изјави за РСЕ портпаролката на Еулекс Ирина Гудаљевиќ, која најостро го осуди како што изјави кукавичкиот чин на насилство против Еулекс.
Косовскиот премиер Хашим Тачи остро го осуди вооружениот напад на ЕУЛЕКС во близина на Звечан.
„Овој напад врз припадниците на ЕУЛЕКС е грд и срамен акт за владеењето на правото и редот во тој дел од територијата на Република Косово, и како таков е осуден од страна на граѓаните и институциите на Косово”, рече тој.