Полицијата соопшти дека го уапсила братот на убиенот телохранител и возач на струшкиот градоначалник Зијадин Села за убиството на заменик-директорот на УЈП Аргетим Асани. Вчера на социјалните мрежи, а потоа и во изјава за медиумите, таткото на приведениот Абудлај Купа рече дека неговиот син се одмаздил за киднапирањето и убиството на неговиот брат Купа.
Уран Купа изчезна во фебруари годинава во близина на Струга. Тогаш во јавноста се шпекулираше дека е киднапиран, а по еден месец истрага тој беше најден убиен во близина на патот кај Дебар. Истражните органи и по 6 месеци не го најдоа убиецот на Купа. Но изјавата на таткото зборува дека тој и неговиот син биле силно убедени дека виновник и одговорен е Аргетим Асани.
Аргетим Асани беше убиен во центарот на Струга кога од возило во движење во него беа испукани 14 куршуми, како што соопшти полицијата. Од контроверзниот Асани дури се огради и ДУИ од каде што вчера побрзаа да испратат соопштение во јавноста дека тој не бил нивни член.
Асани кого го следеа бројни скандали кои инволвираа криминал и насилство на позицијата заменик-директор на УЈП беше поставен како предлог на ДУИ. Ова во 2014 во изјава за НОВА го кажа портпаролот Мухамед Хоџа, кој уште и дополни дека „поставувањето на директори е договор помеѓу коалиционите партнери“, како и дека „Асани бил во процедура да стане член на ДУИ“.
Тој како заменик директор беше и должник на даноци на Управата за јавни приходи, па дури и ја тужеше УЈП. Овој скандал кој го објави НОВА, а потоа и ДПА поднесе пријава до Антикорупциската комисија помина во знак на молк од страна на сите државни институции.
Асани во написите на медиумите на албански јазик беше често опишуван како човек кој се однесува како локален шериф и како некој кој ја користи позицијата во УЈП за уцени и рекет, а често е споменувана и неговата блискост со Али Ахмети.