Топ тема во албанските медиуми сѐ уште е убиството на познатиот бизнисмен од Тирана, Артан Санто. Според тамошните медиуми, четиричлениот истражен тим, под раководство на Петрит Фуша, работи на прибирање податоци кои би го советлиле овој настан што ја возбуди албанската јавност.
Повикувајќи се на неофицијални извори, медиумите од Тирана информираат дека обвинителството составила список со имиња на лицата кои ќе бидат повикани на разговор, во која се опфатени бизнисмени и партнери со кои соработувал убиениот Санто.
Албанските медиуми информираат дека обвинителството побарало информации и од некои странски извештајни служби и дека истрагата може да се прошири и во дел од соседните земји во кои починатиот имал деловни соработници.
Се дознава дека од канцеларијата на Санто се запленети неговиот работен компјутер како и други лични предмети кои би можеле да и помогнат на истрагата.
Во меѓувреме, албанската полиција распиша награда од 100 илјади евра за секој што ќе достави квалитетни информации во врска со убиството на Санто. Албанските медиуми информираат дека во врска со овој настан се сослушани Астрит Бушати и Кујтим Чела.
И двајцата се познати на албанската полиција и на тамошната јавност. Кујтим Чела е брат на Гезим Чела, еден од босовите што го контролираат шверцот со дрога во Албанија.
За убиството на Санто сѐ уште никој не е прогласен за виновен. Она што посебно ја интригира албанската јавност е фаткот што атентатот врз бизнисменот Станто се случи среде бел ден, во најфреквентниот кварт на Тирана и речиси пред очите на многуте полицајци кои го обезбедуваат овој дел од градот. На двајцата мотоциклисти што го извршија убиството им успеа да побегнат минувајќи низ многуте главни улици на Тирана, без да остават никакви траги зад себе.