При редовните контроли на Управата за јавни приходи, во ночните часови меѓу 27 и 28 декември, регистрирани се неправилности при работењето во седум угостителски објекти во Скопје од вкупно 20 кои биле контролирани.
Поради нерегистрирањето на готовинските плаќања, за објектите е изречена времена забрана за вршење на дејност од 15 дена, а за даночните обврзници изречена е глоба во висина до 3250 евра во денарска противвредност, соопштува УЈП.
Оттаму велат дека предновогодишната потрошувачка го зголемува ризикот од неевидентирање на готовинскиот промет, и токму затоа ги потсетуваат сите даночни обврзници на почитување на обврската за регистрирање на готовинскиот промет и за издавање на фискални сметки на потрошувачите.
Од УЈП напоменуваат дека се редовно присутни на терен, особено на местата со изразено зголемен промет во овој период – угостителските и објектите кои вршат малопродажба.