Нема потреба од кревање паника во земјата поради мајмунски сипаници, а целта на Комисијата е да го подготви системот колку што е можно подобро за одговор на евентуална епидемија, рече д-р Мехмедовиќ.
Комисијата покажа загриженост затоа што имаме ширење на мајмунските сипаници во светот и тоа надвор од оние ендемични базени како што е Централна Африка и западна Африка. Светот и Светската здравствена организација и сите релевантни институции коишто ги следат заразните болести, покажуваат, исто така, одреден степен на загриженост во однос на тоа како се шират мајмунските сипаници, изјави по денешниот состанок д-р Злате Мехмедовиќ, портпарол на Комисијата за заразни болести.
Комисијата денеска препорачала и да се укине задолжителното поседување на ПЦР-тест за некои операции во здравствените установи, и приложување само на брзиот антигенски тест. За таа намена, околу илјада антигенски тестови се на располагање на секоја ЈЗУ, каде има и резерви за граѓаните да не ги купуваат.
Тој нагласува дека сепак нема потреба од кревање паника во земјата поради мајмунски сипаници, а целта на Комисијата е да го подготви системот колку што е можно подобро за одговор на евентуална епидемија.
– На Комисијата денеска од тие причини беа дискутирани и клиничките патеки за следење, скрининг, дијагностика и третман на пациентите коишто ќе бидат евентуално заболени од мајмунски сипаници, додаде д-р Мехмедовиќ.
Во врска со ковид-19, Мехмедовиќ рече дека нема потреба од дополнителни интервенции.
– Согласно податоците од Институтот за јавно здравје состојбата е стабилна, има намалување на неделната инциденца. Сметаме дека во насока на тоа како се во моментот предвидени мерките за заштита, дека нема потреба од дополнителни интервенции кои што би требало да направат одредени измени во начинот со кој се контролира трансмисијата на вирусот, вели Мехмедовиќ.