На воената парада во главниот град на Украина учествуваа најмалку 1500 војници, проследени со оклопни возила и камиони со ракетни системи. Во кусиот говор, украинскиот претседател Петро Порошенко рече дека земјата не сака војна, јавува Дојче веле.
„Ние сакаме мир!“, нагласи тој.
Воената парада, во близина на плоштадот Мајдан, каде во текот на зимата имаше демонстрации за интеграција на земјата во Европа, ја следеа голем број граѓани. Улицата Крешчатик е свечено украсена во сино и бело, боите на нацијата. На парадата во Киев се гледа како на демонстрација на сила во конфликтот на прозападната влада и проруските сепаратисти.
Парадата, поради крвавите борби на истокот на земјата во време на финансиска криза не е неспорна. Но, се работи за „гест на поддршка на нашите единици кои се борат на исток“, а не за победничка парада, изјави Андреј Лисенко од Советот за безбедност на Украина.
Воена парада е планирана и во пристанишниот град Одеса. Во меѓувреме, во тешки борби во Доњецк од гранати е оштетена една болница и една мртовечница во градот. Засега нема податоци за жртви.
Сепаратистите соопштија дека во контраофназива опколиле околу 5000 припадници на украинската армија и 30 тенкови, но засега нема потврда за такво нешто од независни извори.
Вчера, германската канцеларка Ангела Меркел во Киев побара „двостран прекин на огнот“ за да се стави крај на конфликтот во Украина.
Во услови на бес на Запад по инвазијата на рускиот конвој, германската канцеларка Ангела Меркел се сретна во Киев во сабота со украинскиот претседател Петро Порошенко.
На заедничката прес-конференција, Меркел изјави дека не може да се отфрлат понатамошни санкции против Русија, доколку нема напредок во решавањето на ситуацијата во источниот дел на Украина.
Во меѓувреме, Украина ќе добие кредит од 500 милиони евра од Германија, изјави канцеларката Ангела Меркел во Киев.
Парите ќе бидат искористени да помогне во обновата на оштетената инфраструктура на земјата, изјави Меркел на заедничката прес-конференција со претседателот Петро Порошенко, во украинскиот главен град во сабота.
Уште 25 милиони евра ќе одат кон помагање на бегалците, рече таа.
Четири месеци од борбите во источна Украина загинаа повеќе од 2.000 лица. Повеќе од 330.000 луѓе ги напуштиле своите домови.