После четири дена боледување, украинскиот претседател Виктор Јанукович се враќа на работа. Опозицијата охрабрена од ветувањата од Западот, продолжуваат со протестите на улиците во Киев. Активистот Дмитриј Булатов, кој во текот на протестите беше измачуван и оставен во шума, ја напушти Украина.
Виктор Јанукович соопшти дека се враќа на работа после четири дена боледување, додека демонстрантите и понатаму не се повлекуваат од плоштадот во центарот на Киев, барајќи од Јанукович да си даде оставка.
Опозициските лидери пак, обраќајки се пред насобраните по состанокот со лидерите на ЕУ и САД, им порачале дека ја имаат меѓународната поддршка во посредувањето во преговорите со Владата и со промените во Уставот, со што би се лимитирала моќта на шефот на државата, пренесува Гардијан.
Во вторник се очекува и посета на високата претставничка на ЕУ за надворешна политика и безбедност, Кетрин Ештон.
Боледувањето на Јанукович, украинските критичари го нарекуваат тактички потег, со што би се намалил притисокот околу политичкиот компромис.
Јанукович во петокот потпиша Закон за укинување на новите непопуларни ограничувања на собирите за протести, но со тоа не успеа да ги смири противниците кои бараат ослободување на десетина уапсени во последните неколку недели.
Виталиј Кличко, повика на неодложно и безусловно ослободување на сите демонстранти.
Повикувајќи на комплетна промена на раководството, опозиционерите кои присуствуваа на безбедносната конференција во Минхен, им порачаа на граѓаните дека ќе ја имаат и меѓународната економска помош доколку ја преземат власта, по што охрабрени од ветувањата, илјадници демонстранти излегоа на улиците.
Во меѓувреме, премиерот Сергеј Арбузов, најави дека наскоро ќе се именува нова влада.