Денеска беше одбиено барањето на опозицијата да се гласа за доверба на Владата во Украина, бидејќи опозицијата собра 186 гласови наместо потребните 226. Премиерот Азаров вети дека ќе ја реконструира Владата и се извини за бруталната акција на полицијата над демонстрантите.
„Сакам да се извинам во име на Владата за постапките на нашата полиција на Плоштадот на независноста“, изјави премиерот Микола Азаров.
За гласањето за недоверба на Владата се произнесоа трите главни опозициски партии, кои бараа оставка од Азаров.
На дебатата, претставниците на опозицијата извикуваа „срамота“ и „револуција“ за време на говорот на пратениците од редовите на владејачката партија.
„Срамота за вашиот Претседател и срамота за вашата Влада“, извикуваше пратеникот од најголемата опозициска партија, Арсениј Јацењук, додека илјадници демонстранти ја окупираа зградата на Парламентот, барајќи промена на Владата.
Одлуката на претседателот Јанукович минатата недела да не го потпише договорот за економска и политичка соработка со ЕУ, во името на Царинската унија со Русија, беше причината за илјадниците демонстранти на улиците во Киев.
За време на протестите викендов, демонстрантите се судрија со полицијата, која употреби солзавец и шок-бомби, но протестите сеуште траат.
Рускиот претседател Владимир Путин, ги окарактеризира немирите во Киев како обид на опозицијата да ја разниша легитимната власт со добро подготвени акции однадвор.
Путин додаде дека по се, изгледа дека демонстрантите се „многу добро подготвени и обучени милитантни групи“.
Неодамна, за „Euronews“, Тамара Гузенкова, специјалист за проблемите на поранешните Советски земји, и заменик-шеф на Рускиот институт за стратешки студии во Москва, објасни дека проблемот во Киев лежи во тоа како да се изградат односи со земја која се интегрира со друга унија, додека истовремено има доста блиски економски соработки со земја која не се интегрира со ЕУ.
Гузенкова напомена дека на Украина треба да и се даде време, и сега треба да настане период на смиреност, без заеднички пристап како што тоа се прави сега –да се дискутира за проблемот посмирено, и да се најде време да се седне и преговара, да се мисли како Украина, која е многу голема земја, може да избегне банкрот, за да одбере најдобар можен начин да се развива геополитички и економски.
видео: JewishNewsOne