Украина соопшти дека нејзините граничари вршат инспекција врз контроверзниот руски конвој за помош паркиран на границата, јавува Би-Би-Си.
Украински официјални лица цитирани од агенцијата Интерфакс изјавија дека товарот се проверува- наменет за градовите во источна Украина, држени од страна на про-руски бунтовници.
Украина се плаши дека конвојот може да носи воена опрема за востаниците, обвинување кое Русија го отфрли.
Во четвртокот, двајца новинари рекоа дека виделе возила на руската армија кои се движеле кон Украина, во територијата која ја држат бунтовниците.
Украински официјални лица од безбедноста изјавиле дека забележале колона од оклопни возила и воени камиони кои одат кон Украина.
Владата на Русија постојано негира директно вооружување или обука на бунтовници, кои предизвикаа конфликт во април, кога тие ја презедоа контролата врз неколку градови во источна Украина.
Конфликтот, што одзеде повеќе од 2.000 животи, се интензивираше во последниве недели.
Во четвртокот, имаше тешко гранатирање во бунтовничките упоришта на градовите Донецк и Луканск.