Агенцијата при ОН одговорна за правата на бегалците, УНХЦР изрази длабока загриженост за корекциите кои ги најави Унгарија во Законот за азил кои се ставени на дебата пред Парламентот денеска.
УНХЦР бара унгарската влада да не брза со процесот без претходно да се консултира со граѓанското општество и УНХЦР за последиците кои можат да настанат.
– Донесувањето на предлозите ќе имаат уништивачки карактер за илјадници луѓе кои својата безбедност ја бараат во Унгарија, вели регионалниот претставник на УНХЦР за Централна Европа, Монтсерат Фиксас Фихе.
Бараме од унгарската Влада и јавните претставници , сите амандмани во правната рамка за барање азил, бидат во согласност со меѓународните стандарди, додаде Фихе.
И комесарот за човекови права при Европската комисија, Нилс Мужникс, изрази загриженост за политиките на Унгарија кои се однесуваат на бегалците.
– Загрижен сум за предлогот на Владата на Унгарија да се корегира Законот за азил. Доколку се прифатат измените како такви, само ќе се влоши состојбата со заштитата на бегалците во Унгарија. Наместо да им се влоши ситуацијата на оние кои бараат азил, унгарските власти треба да ја подобрат правната рамка и системот за азил, за да се справат со предизвиците од масовната миграција на луѓе кои бегаат од војни, и дека тоа ќе биде спроведено во согласност со меѓународните стандарди за човекови права, изјави тој.
Тој го повика унгарскиот Парламент да не ги донесе измените со кои би се поткопало правото на барање азил, што е еден од најголемите успеси во демократските општества.
Унграскиот Парламент денеска ја разгледува можноста по брза постапка да ги усвои предлозите.
Предлозите вклучуваат брз скрининг на барањата за азил, барателите на азил да бидат испратени во други земји, дозвола за пролонгиран престој за жени, деца и луѓе со посебни потреби.
Унгарската влада неодамна соопшти дека планира изградба на ограда на границата со Србија. И додека УНХЦР го признава правото на државите сами да ги контролираат своите граници, тие апелираат дека тоа мора да се направи на начин на кој ќе бидат заштитени правата на бегалците.
УНХЦР стравува дека оградата само ќе ја влоши ситуацијата и ќе ги втурне луѓето во рацете на шверцерите.
Унгарија во првите шест месеци од 2015 година има околу 61 000 барање за азил. Околу 80 отсто од барателите доаѓаат од земјите каде што има воени жаришта, најчесто Сирија, Авганистан и Ирак.