Статистиката што ја имаме укажува на итна потреба да се создадат можности за вработување на Ромите и да се промени пристапот во оваа област во земјите од регионот на Балканот – изјави денеска Орхан Усеин, прв човек на акцискиот тим на Регионалниот совет за соработка (РСС) за проектот Интеграција на Ромите 2020 година.
Усеин, овој и другите заклучоци, ги изнесе на отворањето на Регионалната конференција за иновативните пристапи за вработување на Ромите, што заеднички ја органзираат РСС, Платформата за вработување и социјални прашања и Фондот за образование на Ромите, а која се одржува во Будимпешта.
Споредбите помеѓу 2011 и 2017 година покажале дека вработувањето на Ромите е дури и влошена, а таквата состојба се одразува негативно на социјалната состојба на Ромите, беше кажано на Конференцијата. Анализата на спроведувањето на политиката за Интеграција на Ромите за 2017 година, исто така покажала дека само 54 отсто од мерките од акциските планови за вработување на владите во регионот се целосно или делумно спроведени.
Ова го потврди и претставникот на Европската комисија Доминик Бе, кој рече дека, иако сите земји аспиранти за ЕУ од Балканот имаат национални стратегии за интеграција на Ромите, нема никаков напредок во вработувањето, а стапките на младите Роми што немаат работа, пристап до образованието или домувањето, се дури и влошени.
Интеграцијата на Ромите беше поставена од ЕК како еден од важните услови за земјите кандидати или аспиранти за членство во ЕУ уште во 2016 година.
На конференцијата учествуваат преку 50 државни службеници на земјите од Регионот меѓу кои и од Македонија, како и претставници на невладини организации, на УНДП и на Европската комисија.