Кандидатите за претседател, до Државната изборна комисија треба да ги поднесат кандидатурите најдоцна до 21. март, а изборната кампања започнува на 1. април.
За официјализирање на претседателската кандидатура потребно е кандидатите да достават 10.000 граѓански или 30 пратенички потписи.
Според ДИК, за шестите претседателски избори во моментов потписи собираат седум кандидати и оти досега само кандидатката на ВМРО-ДПМНЕ, професорката Гордана Силјановска Давкова ги има собрано потребните потписи.
Сé уште е неизвесно дали заедничкиот кандидат на СДСМ и ДУИ, Стево Пендаровски до ДИК ќе достави потписи од граѓани или од пратеници. Од СДСМ велат дека размислуваат и за двете варијанти.
Потписи за да учествува на претседателските избори собира и Блерим Река, кого го поддржаа Алијансата за Албанците и БЕСА.
Потписи собираат и Филип Петровски, Господин Поповски, Јосиф Мирчевски.
Собирањето потписи започна на 23 февруари, а ќе заврши на 9 март. Доставувањето, пак, на кандидатурите завршува на 21 март.
На 14 март истекува и рокот за увид во избирачкиот список и пријавувањето за гласање на дијаспората. Досега се регистрирани само 413 македонски граѓани кои своето избирачко право ќе го остварат во дипломатско конзуларните претставништва на земјава.
Првиот изборен круг за шестите претседателски избори е закажан за 21 април, а вториот ќе се одржи на 5 мај.
ДИК: Претседателската кампања не е предвреме започната, има само партиски активности