МВР го знае времето и брзината со која загинал Никола Младенов, но информациите нема да ги сподели се додека вештањето не биде комплетно завршено.
-Утврдена е брзината со која возел, времето на ударот, вртежите на колата пред да излета. Удрил во левата страна на банкината, па потоа во десната страна каде ја пробил и излетал. Ние сето она што го имаме ќе го доставиме до истражниот судија откако ќе заврши целосно вештачењето. Се вештачи автомобилот, имаме примероци од крвта , облеката на Младенов, вели Иво Котевски, портпарол на МВР.
“Фокус”: Младенов се враќал од Велес
Неделникот “Фокус” чие прво издание без Никола Младенов треба да излезе вечерва, во истражувањето за околностите под кои загина нивниот колега, откриваат дека покрај телото на Младенов бил најден и билет за платена патарина во правецот на Велес во 20 часот. Претпоставката е дека новинарот веројатно бил во околината на Велес бидејќи не биле пронајдени други билети од патарини.
Според пишувањата на “Фокус”, телото на Младенов било пронајдено 20 метри подалеку од автомобилот. Покрај вештакот на МВР, истражниот судија повикал и независен вештак да се вклучи во истрагата.
Остануваат многу отворени прашања во врска со несреќата
Изминува трет ден откако се случи несреќата во која загина новинарот и основач на весниците “Фокус”, но институциите не одговорија со подробности и детали во врска со неговата смрт.
-Работа на полицијата е да изврши вештачење, да утврди дали имало други автомобили во времето на несреќата и слично. Не би сакале ништо да споделувале со јавноста и да шпекулираме се додека комплетно не заврши вештањето. Штом заврши ќе има соопштение и ќе ги доставиме нашите наоди, вели Котевски.
Новинари и граѓани реагираат на социјалните мрежи дека МВР постапува нетранспарентно и не споделува никакви информации со јавноста во врска со истрагата, иако се работи за новинар и јавна личност од широко општествено значење, со што само придонесува во подгревањето на шпекулациите.
Во меѓувреме, се поставуваат отворени прашања во врска со околностите во кои загина Младенов. Каде бил пред несреќата, од каде доаѓал, дали се разгледани неговите телефонски листи и камерите од наплатните рампи на патарината по која Младенов би морал да помине.
Неговата сопруга последен пат го чула во 22 часот вечерта, кога тој кусо и одговорил дека има уште малку работа и дека бргу ќе си дојде дома. Младенов од дома излегол некаде околу 19 часот. Во тоа време требало да се сретне со Кире Наумов, поранешниот директор на Агенцијата за разузнавање. Наумов за Нова рече дека по неуспешните обиди да го добие на телефонот ( на едниот не бил достапен, а на другиот исклучувал), престанал да го бара под претпоставка дека нешто важно му искрснало.
Телото било пронајдено речиси 12 часа по несреќата, а го пријавил вработен во Македонија пат. Според портпаролот на МВР, не било многу чудно тоа што никој не обрнал внимание на разорената банкина, па ниту полициската патролна служба.
-Можно е да не се забележи. Ќе видите скршена банкина кога поминувате, претпоставувате дека нешто се случило пред вие да поминете и одминувате. Исто и патролната служба, а патишата и банкините се надлежност на Македонија пат не на МВР, одговори Котевски.
Во секое време се очекува да излезат наодите од вештачењата на судска медицина и МВР, кои можеби ќе понудат повеќе детали.
Фото: Превземено од Утрински весник