Следната седница на Уставниот суд на која ќе се донесе конечната одлука дали ќе има измени во Законот за помилување ќе биде одржана во среда на 16. март.
Во следната фаза судијата-известител по добивањето или недобивањето на мислењето од парламентот ќе поднесе предмет за кој со просто мнозинство уставните судии ќе треба да одлучат дали ќе го уважат, неуважат или ќе го отфрлат предлогот за менување на правата кои законски од 2009 година му се ускратени на шефот на државата.
Доколку и во втората фаза помине Иницијативата за ваква измена, која наиде на бурни реакции во јавноста и протести пред судот, тогаш претседателот ќе има зголемени ингиренции и ќе може да помилува затвореници кои се осудени за изборен криминал, кривични дела против полова слобода и морал и недозволено производство и пуштање во промет на дрога.
Подносител на Иницијативата е Ристо Китевски – млад адвокат од Охрид кој е соработник во канцеларијата на Љубчо Наумовски, еден од адвокатите на Јанкулоска и Темелко – осомничени за злосторничко здружување и изборен фалсификат во случајот „Титаник“ кој е во тек.
Иако Собранието и Владата пред неколку дена се изјаснија и оценија дека не треба да се менува или преиначува спорниот член од важечкиот Закон за помилување, сепак, Уставниот суд вчера најави дека ќе побара мислење од парламентот. Од Собранието засега нема коментар.
Без разлика на мислењето на Собранието, од судот најавија дека постапката ќе тече според правилата.
Денеска и Европската унија реагираше со став дека иницијативата за помилување е спротивна на одлуките на Собранието и политичките партии и ги минира напорите на ЕУ и САД за кредибилни избори.
Според портпаролот на комесарот Јоханес Хан, секоја сугестија за неказнивост во однос на изборните злоупотреби ќе бидат контрапродуктивни за напорите на меѓународната заедница која сака да се создадат услови за кредибилни избори.
“Во однос на влијанието што тоа би можело да го има на предвремените парламентарни избори, како што предвидува договорот од Пржино, нивната цел е да бидат клучен чекор во реформскиот процес кој ќе ја врати довербата на граѓаните во изборниот процес и ќе и помогне на земјата да ја надмине политичката криза”, вели Маја Коцијанчич во име на ЕУ на прашање на НОВАТВ.