Утревечер, пред платото на ГТЦ ќе се случува некогашното скопско Корзо, кое според организаторите, барем на една ноќ, ќе му го врати на Скопје некогашниот сјај и спомените од минатото.
На корзото, повозрасните жителите на Скопје ќе имаат уникатна можност да се навратат во 60-ите, 70-ите и 80-ите години на минатиот век кога градот живееше во ритамот на непосредното дружење и добрата забава, додека пак помладите генерации ќе можат да го почувствуваат пулсот на Скопје во времето кога градот испишуваше една поинаква урбана приказна.
За корзото да биде автентично ќе се погрижи DJ-от Драган Б. Костиќ кој со неговата селекција на добра ретро музика ќе им овозможи на Скопјани да ги доживеат пријатните спомени од младоста.
Корзото ќе започне во 20 часот пред платото на ГТЦ (кон паркот Жена – Борец) и ќе трае до 23 часот.
Овој настан е дел од кампањата „Излези за ГТЦ“ која има цел да ги мотивира граѓаните во Општина Центар да излезат на претстојниот референдум кој ќе се одржи на 26-ти Април на кој граѓаните на Општина Центар ќе одлучуваат за изгледот на ГТЦ.