За утре во Клубот на пратениците во Скопје е закажана лидерска средба на која премиерот Зоран Заев и министерот за надворешни работи Никола Димитров ќе ги информираат претседателот на државата Ѓорге Иванов, претседателот на Собранието Талат Џафери и лидерите на политичките партии за преговорите со Грција за спорот со името, најави премиерот Заев во Охрид.
-Би сакал да се запази редот, да има информирање за деталите. Прво да му ги соопштам на претседателот на државата, на лидерот на опозицијата, на лидерот на најголемата албанска партија, претседателот на Собранието. Тоа е редот, за да имаме шанса да изградиме национален консензус по вака важно прашање. Веднаш по состанокот ќе дадеме изјава и сето ќе го споделиме со јавноста, рече Заев.
Тој појасни дека министерот за надворешни работи Никола Димитров веќе ги контактира сите поканети на средбата, изразувајќи уверување дека сите ќе бидат присутни на средбата, оттаму што станува збор за премногу важно прашање за да се откаже разговор на темата.
Заев истакна дека на вечерашната закажана средба со партиските лидери не е планирано да се разговара за прашањето околу името, појаснувајќи дека и процесот „Жан Моне“ е посветен на мошне важно прашање, така што целосно ќе биде посветена токму на тој процес.
Премиерот не сакаше да коментира каков е неговиот став како граѓанин, а не како премиер, по однос на можниот предлог што се објавува по медиумите, апелирајќи на трпение за да се даде шанса да успее преговарачкиот процес.
Од Владата потврдија дека покани се испратени до претседателот и до сите политички партии.
Средбата доаѓа по вчерашните разговори на премиерите Заев и Ципрас во Софија, по која Заев изјави дека е утврдена една опција што е прифатлива за двете страни, но дека за неа прво треба да се консултираат со сите релевантни фактори во своите земји.
За утре и грчката Влада најави дека ќе одржи консултации со грчкиот претседател Прокопис Павлопулос за последниот предлог што бил од македонска страна.
Премиерот Заев и претседателот на опозициската ВМРО ДПМНЕ Христијан Мицкоски ќе се сретнат и вечерва во Охрид, во рамки на дијалогот „Жан Моне“, каде што се и лидерите на Беса, на ДПА и на ДУИ, Билал Касами, Мендух Тачи и Али Ахмети.
Дипломатски изори за НОВА потврдија дека „Република Илинденска Македонија“ е предлогот за решавање на спорот за името, за кој вчера во Софија разговарале македонскиот и грчкиот премиер Заев и Ципрас. Предлогот бил наводно прифатлив и за грчката страна, која инсистира новото име да важи „ерга омнес“ .