Министерството за финансии за утре најави ново задолжување кај домашните кредитори во износ од 10,8 милиони евра.
Според најавата, Владата ќе побара 4,87 милиони евра преку 12-месечни државни записи и уште 5,93 милиони евра преку 15-годишни државни обврзници.
Инаку, по издавањето на последната еврообврзница, јавниот долг, според заменик министерот за финансии Кире Наумов е над 50 посто од БДП.
На 13 сепетмври Министерството за финансии ја откажа закажаната аукција на државни записи, со образложение дека целта е „сведување на домашното нето задолжување по основ на државни хартии од вредност кон нула, со што ќе се остават повеќе ликвидни средства во стопанството за кредитирање на бизнисот“.
Дополнителниот заменик министер за финансии Кире Наумов изјави дека смета дека овој чекор е „срамен и неуспешен обид да се прикаже наводна грижа за стопанството“.
– Вистината е дека денешната аукција на државни хартии не е откажана, туку во наредниот период од седум дена до наредната предвидена аукција не доспеваат долгови за враќање кон домашните кредитори.
Во септември по основ на домашно задолжување долгови за враќање доспеваат на 07-ми, 21-ви и 29-ти, а предвидени се уште аукции за задолжување на 20-ти и на 27-ми септември . Долгот што доспеваше на 7-ми во месецот се врати со средствата од аукцијата одржана ден претходно, со која дополнително јавниот долг се зголеми за нови пет милиони евра. Повторно се прави обид за манипулација со наводно намалување на домашно задолжување кон нула. Согласно официјалните податоци домашното задолжување заклучно со месец август изнесува повеќе од 79 милијарди денари, беше наведено во соопштението од Кабинетот на Наумов.