За утре е закажана првата аукција на државни записи и обврзници во новата 2016-та година. Владата ќе побара од домашните кредитори речиси 15,5 милиони евра, а во износ на истата сума следниот ден доспеваат за раздолжување стари издадени хартии од вредност.
Според објавените проекции, околу 13 милиони евра ќе бидат позајмени преку државни записи со рок на доспевање од 6 месеци, односно 1 година. Останатите 2,4 милиони евра ќе се обезбедат преку државни обврзници, сума што ќе треба да се врати за 10, односно 15 години. До крајот на месецов се закажани уште две аукции, а заклучно со јуни следуваат уште 23 аукции. До средината на година по основ на издадени и доспеани за исплата државни хартии од вредност државата треба да врати над 491 милиони евра.
Неодамна дополнителниот заменик министер за финансии Кире Наумов, изјави дека досега немало толку многу аукции како во календарот за годинава, особено во предизборните месеци.
– Според календарот само во 2 од 26 вторника (вторник е ден кога се одржуваат аукциите) не се предвидени задолжувања. Првиот вторник беше 5-ти јануари, кога ниту законски не беше можно да има аукција и нареден вторник кој е пропуштен е 24-ти мај, кој пак е неработен ден. Дури во јануари една аукција, наместо во вторник е закажана за среда, односно на 20-ти јануари, затоа што тој вторник е неработен ден. Во предизборните месеци се закажани аукции за скоро сите вторници, особено во март кога има 5 аукции, изјави Наумов.
Токму задолжувањата на домашниот пазар на крајот на минатата година беа причина за конфликт помеѓу министерот за финансии Зоран Ставрески и дополнителниот заменик министер за финансии Кире Наумов, за што Наумов стави вето, кое беше одбиено од страна на стариот состав на ДИК, а СДСМ поднесе тужба до Управниот суд.