„Паркот не паѓа“. Ваква е најавата на социјалните мрежи за целодневниот собир на жителите на Тафталиџе закажан за 21. август (утре) во паркчето на улицата Букурешка. Идејата доаѓа откако жителите неделава повторно го блокираа паркот и не дозволијa работниците со механизацијата да почнат со копање на темелите на нова петкатница.
Во најавата на иницијативата „Зелено Тафталиџе“ се вели дека организирано е целодневно дружење на граѓаните со цел да се даде до знаење дека паркот нема да падне.
-Оваа недела (21.08.16) со почеток во 12 часот во паркчето на ул. Букурешка, организираме целодневно дружење на граѓаните со цел да му се даде до знаење на УЗУРПАТОРОТ на овој простор, дека ПАРКОТ НЕМА ДА ПАДНЕ! Зачестеното присуство на багерите и градежните работници се јасен индикатор за намерата која ја имаат за овој простор, затоа наша должност е да ја сочуваме оваа прекрасна зелена површина.
Дружбата ќе вклучува дискусија околу константното бетонирање на зелените површини, правење на скара и освежување со некој ладен пијалак. Дојди во недела, прави скара со соседите, дружи се и сочувај го паркот. Не дозволувај да фрлат бетон врз твојата иднина. Да се користи паркот како што треба, стои во повикот за собир.