Денеска во селото Кшање, 23 осудени лица од КПУ Затвор Куманово добија уверенија за стручно завршена обука за пекар и аргон заварувач, со обуки реализирани преку Министерството за образование и наука, УНДП и Управата за извршување санкции.
На свеченоста во затворот присуствуваа министерката за образование, Рената Дескоска, директорот на Управата за спроведување санкции, Јовица Стојановиќ и постојаниот претставник на УНДП во Македонија, Лујза Винтон.
Дескоска потенцираше дека станува збор за значаен образовен проект, кој освен образовна компоненета има и вредност од социо-хуманистички аспект.
Директорот на управата за спроведување на санкции Јовица Стојановиќ, рече дека како установа се посветени на постојано унапредување на условите и можностите за обука, кои се значајни за понатамошниот живот на учесниците во обуките.
Тој додаде дека заедно со МОН ќе преземат мерки и активности за дообразување на лицата од установите.
Претставници од училиштата кои ја спроведоа обуката им ги доделија уверенијата, а на свеченоста присуствуваше и раководителот на казнено поправната установа Куманово, Марјан Спасовски.
Од вкупниот број лица, 12 добија уверенија за пекар, додека 11 лица се стекнаа со сертификати за завршен аргон заварувач.
Стручните обуки за пекар и аргон заварувач опфаќаа повеќе од 200 реализирани часови обука од страна на средните стручни училишта – спроведувачи на обуки за наведените занимања.