Денеска, тимот предводен од потпретседателот на Социјалдемократскиот сојуз на Македонија, Ванчо Узунов оствари средби со повеќе групи граѓани во Гостивар.
Власта покачувањето на пензијата, што следува законски, го дели како поклон. За време на избори велат дека пензиите се покачени за 5%, а претходно ги намалија за 3%, се пожалија пензионерите на средбата со потпретседателот.
Узунов посочи дека СДСМ ќе ја усогласува висината на пензијата со трошоците за живот. Тој истакна дека владата на ВМРО-ДПМНЕ ја подели нашата земја на ултра богати граѓани и крајно сиромашни. Овие богати луѓе се богати по светски стандарди. Тие спијат во Дубаи, наредниот ден летаат за Монте Карло. Оваа поделба е најистакната во нашата земја, не поделбата по етничка или партиска линија, нагласи тој.
Роуд шоуата не носат инвестиции. Тоа се џабе потрошени пари на граѓаните. Владата треба да креира добра бизнис клима, а не да се меша во бизнисот, посочија бизнисмените на средбата со Узунов.
Во пазарната економија пиедесталот им припаѓа на граѓаните и бизнисмените, не на политичарите, потенциташе Узунов кој додаде дека предлог мерките на СДСМ значително ќе го стимулираат развојот на приватниот сектор.
Како е можно Груевски и неговата Влада да предвидат колку прекршоци ќе направат граѓаните наредната година? Толку ним им се потребни за да ги пополнат дупките во буџетот. Тие целосно го злоупотребија инструментот прекршочна казна. На овој начин се заплашуваат и се казнуваат и помалите и поголемите фирми. Клучна политичка определба на СДСМ во оваа сфера е државата да ги тргне рацете од бизнисот, за тој слободно да дише. Идната влада на СДСМ токму тоа ќе го направи. Бизнисот да си тера бизнис.
