Тројцата европратеници Иво Вајгл, Кнут Флекенштајн и Едуард Кукан кои се во посета на Македонија денеска заеднички констатираа дека забележале „нова динамика напред во земјата“.
-Задоволни сме од интересот искажан од спикерот и лидерите на политичките партии за вклучување во дијалог за работите од стратешка важност за земјата и нејзините граѓани, вклучително за реформите неопходни за напредок на патот за евроинтеграција. Во пресрет на локалните избори, ги охрабруваме сите политички претставници и институции да се однесуваат одговорно и да обезбедат еднакви услови за сите граѓани да ги исполнат слободно своите демократски права, се наведува во заедничкото соопштение на европратенците.
Тие, како и многупати досега, потенцираат дека политичкиот дијалог е неопходен за напредување на патот на итните реформи и за подобрување на парламентарната култура и атмосферата во Собранието.
Европратениците, посочуваат дека на средбите ја изразиле својата постојана поддршка за дијалог меѓу политичките партии, особено за реформската агенда неопходна за членството на земјата во ЕУ и за ефективното институционално функционирање на Собранието.
– Разговаравме како да го унапредиме политичкиот дијалог во Собранието и го поддржиме градењето капацитети за вработените и членовите на Парламентот, вклучително преку техничка експертиза поддржана од Европската комисија, се вели во заедничката изјава на тројцата европратеници.
Во нашата работа со еврокомесарот Хан, се вели во соопштението, секогаш ја покажуваме нашата солидарност да работиме со Собранието за поддршка на државата на патот кон Европска интеграција.