Агенцијата за лекови (МАЛМЕД) денеска ќе предложи до Комитетот за имунизација, 624 вакцини против морбили на кои имаше погрешни декларации, со истечен рок, да бидат уништени. Од МАЛМЕД за НОВА потврдија дека ќе побараат од веледрогеријата „Македонија лек“ да ги уништи спорните вакцини во Дрисла.
„ Овие вакцини се прогласени за неисправни според законската процедура и најверојатно ќе бараме нивно уништување. Спалувањето на вакцините е заради техничката грешка со декларацијата, а не заради тоа што се неисправни“, велат за НОВА од МАЛМЕД.
На прашање на НОВА дали техничкиот пропуст е во надлежност на Агенцијата за лекови, од таму велат дека тоа е одговорност на веледрогеријата која ги набавува и дистрибуира вакцините и тоа е се во делот на Министерството за здравство и самата веледрогерија.
„Ние сме одговорни само во делот на договорите, дозволите и го следиме ладниот ланец“, велат од МАЛМЕД.
Од Агенцијата велат ќе бараат максимална казна за „Македонија лек“ која изнесува од 25 000 до 50 000 евра.
Од Министерството за здравство се уште не соопштуваат кој се ќе понесе одговорност во Здравствените домови и пунктовите за вакцинација каде што вакцинирале деца без да видат рок на траење на декларациите, како и кои директори ќе понесат одговорност.
Од Комитетот за имунизација велат дека целата одговорност е на МАЛМЕД во врска со вакцините. Од таму смируваат дека и покрај техничкиот пропуст вакцините се исправни и со добар рок.
Во врска со ситуацијата со морбили засега ситуацијата се смирува, а велат дека вакцини има доволно додека да бидат испорачани други, од новиот тендер.
„Имавме 16 453 вакцини, а сега со новата серија од истиот тендер од 2016 година имаме уште 10 000 вакцини што се сосема доволно додека стигнат вакцините од новиот тендер“, велат за НОВА во Комитетот за имунизација.
Инаку, последен случај на заразен со морбили е здравствен работник од тетовско кој што работи во Скопје. Случајот бил забележан минатиот петок, а лицето сега се наоѓа на домашно лекување.
Според информациите на Институтот за јавно здравје до се пријавени 75 сомнителни случаи со мали сипаници. По направените епидемиолошки истражувања и лабораториски резултати, 65 се класифицирани како мали сипаници.