На белгискиот посредник помеѓу партиите, Питер Ванхоуте очигледно му претстои тежок период во усогласувањетона ставовите меѓу партиите за функционирањето на Агенцијата за аудио и аудиовизуелни медиумски услуги (АВМУ) и Јавниот сервис.
Напоменувајќи дека предлозите на партиите на тема “медиуми“ од далеку се разидуваат и политички и меѓуетнички, Ванхоуте денеска одржа брифинг со новинарите на кој ја претстави својата платформа за прогрес и за тоа како правилно треба тие да работат. Сепак како што рече, сите засегнати со предложените регулативи “треба да пораснат“ и да дејствуваат според меѓународните стандарди.
Според неговата програма, членовите на Советот на АВМУ треба да се избираат со двотретинско мнозинство во Собрание откако ќе се пријават на јавен конкурс.
Секој истакнат професионалец во оваа област треба да обезбеди поддршка или од две невладини организации, или од едно новинарско здружение, или од два универзитети засегнати од работата на Советот, или од Синдикатот на новинари, за да може да се кандидира како член на Советот, а потоа истиот јавно и транспарентно да биде разгледуван.
Избраните членови би имале мандат од пет години со една шанса за реизбор. Се предлага Директорот на Агенцијата да го именува Советот.
Во случај на прекршување на регулативите од страна на некој медиум, Советот ќе отпочне дијалог со медиумот, и доколку е потребно првата мерка ќе биде предупредување, а лиценца ќе се одзема само во случај на ригорозни прекршувања.
Во однос на финансиски казнувања, Советот ќе треба да одлучува сразмерно финансиите на медиумот, но истата ќе мора детално да ја образложи, бидејќи како што рече Белгиецот Ванхоуте, тој не е за казнени, односно рестриктивни регулативи, туку за воведување на професионализам во овие тела.
Директорот на овој Совет би имал извршна функција, би бил одговорен за работата на Агенцијата а за таа позиција би можел да се кандидира секој истакнат професионалец на отворен повик.
На сличен начин треба да се биде биран и Советот на МРТВ, а меѓународната заедница предлага буџетот на јавниот сервис да биде 1 % од државниот буџет. Тоа би биле пари со кои тие самите ќе одлучат како да ги трошат, од човечки ресурси, до опремување, до реновирање на зградата на Јавниот сервис.
Во однос на владиното рекламирање, Програмата на Питер Ванхоуте предвидува за владините пораки кои се од јавен интерес, Јавниот сервис и комерцијалните медиуми да не добиваат паричен надоместок туку тие да бидат бесплатни.
Под тоа тој подразбира кампањи од типот на “Пушењето е штетно по здравјето“, или кампањи за здравје и слично.
Се предлага и намалување на данокот за комерцијалните телевизии од 18 на 5 отсто.