Published: Thursday, January 27, 2022 00:03
Српската заедница во земјава, ги почна активностите во рамки на одбележувањето на националниот празник на Србите, Денот на Свети Сава кој е на 27 јануари.
По тој повод, вечерва во Занаетчиски дом Куманово, се одржа свечена Светосавска академија, како меѓународно афирмирана манифестација, на која присуствуваа еминентни личности од јавниот и од политичкиот живот како и од дипломатскиот кор во земјава, како амбасадорката на Република Србија Невена Јовановиќ, почесниот конзул на Србија кај нас Владимир Стајиќ и други.
На свеченоста свое обраќање имаше амбасадорката Јовановиќ која покрај за суштината на празникот говореше и за силните врски и мостови што ги градат меѓу двете држави, претставниците на српската заедница во Македонија и македонската во Србија.
Се обрати и претседателот на Демократската партија на Србите Иван Стоиљковиќ, кој и овој пат истакна дека Свети Сава е симбол на српското создавање низ вековите, корен на животот, чувство за времето, историјата и судбината на српскиот народ.
Свое обраќање имаше и градоначалникот на општина Куманово Максим Димитриевски кој го честита овој голем празник и информираше дека се работи на отворање на конзулат на Република Србија во Македонија и тоа во Куманово и дека нема поблиски народи на овие простори од српскиот и македонскиот.
-Оваа прилика сакам пред сите вас да соопштам дека веќе работиме на отворање и со новиот почесен конзул на Република Србија во Македонија на конзулат во Куманово којшто ќе има задача да ги унапредува тие наши братски односи“, рече Димитриевски посебно акцентирајќи ја суштината на Куманово пред се како Македонија во мало поради што му било голема чест да присуствува на оваа свечана академија во името на човекот кој на овие простори го ширел христијанството и се залагал за мир, заемно почитување, вреднување и соживот.Настанот го организира Српската заедница во Република Северна Македонија, регионален одбор-Куманово а истиот имаше и богата културно-уметничка програма.
