Претседателот на Собранието, Трајко Вељаноски, денеска од пред споменикот на Методија Андонов-Ченто во Скопје, претседателот на првиот президиум на АСНОМ, повика на единство и обединување.
Според него, за Македонија останува приоритет членството во НАТО и во ЕУ и вложувањето за развој на државата.
„Како прв меѓу еднаквите пратеници – уште еднаш повикувам на обединување на сите политички структури зад големата идеја на Македонија. Повикувам на дополнително обновување на меѓусебната почит и разбирање помеѓу политичките партии. Тие не смеат да бидат непријатели и мораат да бидат конкуренти кои имаат иста цел. Македонија е нашата заедничка цел. Предолго народот е заложник на една ваква непринципилена политика“, рече Вељаноски.
Иако повика на обединување, тој не заборави во својот говор да спомене непринципиелни политики, алудирајќи на политичарите од опозицијата.
„Македонија, повеќе од една година е предмет на еден непринципиелен политички однос кој ги разградува нејзините државотворни темели и под константен притисок за неправедна промена на основните начела на кои почива современата претставничка демократија. Моќта на граѓаните дадена на избори е под константен притисок и гласот на граѓаните даден на избори е во фаза на континуирана релативизација и обезвреднување. Граѓаните излегоа на избори и гласаа и нивната волја е јасна и недвосмислена.
Сепак наспроти сé, денес овој основен демократски постулат е под закана. Во жарот на политичката битка, опиени од желбата за власт – за жал постојат личности кои на грбот на народот настојуваат да ја приграбат Македонија. Мораме да бидеме јасни и недвосмислени и да кажеме: Доста е! Македонија не беше градена за да се растури“, рече Вељаноски.
Според него, сите обиди за релативизирање на волјата на народот, ниту имале, ниту имаат ниту некогаш ќе имаат некаков успех и тие се осудени на пропаст и осуда.
„Да не си помисли некој дека може да избега од судот на народот. Наследството на секоја личност која добила одговорност да работи за народот е предмет на оценка токму од народот! Порано или подоцна“, рече Вељаноски.