Хелсиншкиот комитет за човекови права апелира до јавното обвинителство веднаш да покрене постапка по допрен глас и да превенира понатамошно насилство врз една долгогодишната жртва, која не добила заштита од институциите, откако во вчерашното сведочење, велешанката Павлина Иловска изјави дека до неа стигнале информации дека колега на починатиот полицаец сакал да се одмазди за убиството.
Дваесет и тригодишната Илоска која во самоодбрана го уби својот парнер денеска, како што објавивме претходно, беше ослободена од обвинението од велешкиот суд.
„Во согласност со Кривичниот законик, нужна е одбраната, која е неопходна. Нападот и одбраната се неопходни елементи. Тој ја влечел, клоцал, ја стегнал околу вратот, неоспорно се утврди од записникот за увид, по самиот увид на настанот, кај обвинетата имало телесни повреди, изразени на главата, ногата и на вратот. Натаму, на овој доказ се надоврзува телесниот преглед на обвинетата“, рече судијката кога го даваше образложението на пресудата.
Инаку, Хелсиншкиот комитет ја поздравува одлуката на Основниот суд Велес да ја ослободи Пале Иловска од обвинението за убиство во миг.
„Водејќи се од изнесените докази на главната расправа, судот констатираше дека делото е направено во нужна одбрана и ја потврди оправданоста на нашите залагања за промена во обвинението, поради историјата на насилство во овој случај“, велат од Хелсиншкиот комитет.
Оттаму најавуваат дека и понатаму ќе ја следат постапката и ќе бара одговорност од полициските службеници од СВР Велес, кои со своето непостапување по пријави за семејно насилство, грубо ги прекршиле своите законски овластувања и овозможиле ескалација на насилството.