Според внатрешниот меморандум, Велика Британија ќе биде овластена да ја нападне Сирија, дури и ако Советот за безбедност не ја одобри акцијата.
Правните советници на британската влада проценија дека има правна основа за воена интервенција врз Сирија без согласност од Обединетите нации, но само ако бидат исполнети три услови. Доколку дојде до блокада во Советот за безбедност на ОН, Обединетото Кралство сè уште би имало можност, според меѓународното право, да преземе исклучителни мерки за да се намали степенот на хуманитарната катастрофа во Сирија преку сперечување или нарушување на понатамошното користење на хемиско оружје од страна на сирискиот режим.
Според доктрината за хуманитарна интервенција, правна основа има ако бидат исполнети три услови:
-Доколку има убедливи докази, општо прифатени од меѓународната заедница во целост, за екстремно хуманитарно нарушување од голем степен, за што е неопходна итна помош;
-Мора да биде објективно јасно дека нема друга практична алтернатива на употребата на сила за да се спасат човечки животи;
-Предложената употреба на сила мора задолжително и пропорционално да има цел на овозможување на потребата за хуманитарна помош и мора да има строго ограничено време и простор за остварување на оваа цел.
Без одобрување на поголемиот дел од опозицијата, премиерот Дејвид Камерон тешко ќе може да го спроведе планот за воена акција врз Сирија. На денешната дебата Камерон сепак пред британскиот парламент рече дека е незамисливо Британија да го направи тоа доколку постои сериозна опозиција во Советот за безбедност.
„Незамисливо е да се спроведе такво нешто доколку постои цврсто противење во Советот за безбедност“, изјави тој.
Според американскиот претседател Барак Обама, САД заклучиле дека сириската влада спровела напади со хемиско оружје во близина на Дамаск, а за тоа мора да постои одговорност.
Додека советот за безбедност на ОН расправа за Резолуција со која би се допуштила воена интервенција на Западот во Сирија, Вашингтон и Лондон се чини се нестрпливи па се подготвуваат за напад иако инспекторите на ОН се уште не објавиле податоци за тоа дали силите на Башар ал Асад навистина користеле хемиско оружје, односно нервен гас сарин.
Сиријскиот претседател Башар ал-Асад денес потврди дека земјата ќе се брани од било каков напад од странство, пренесуваат државните медиуми.
„Сирија ќе се брани од било каква агресија, а заканите само ќе ја зголемат посветеноста кон принципите и независноста“, изјави Асад.