Виктор, не си многу оригинален. Прво ги копираше политиките на Путин, потоа зеде пари од ЕУ а сега ги крадеш моите идеи за кампања. Ќе треба подобро да работиш до мај 2019 година!
Со оваа остра Твитер порака, лидерот на европските либерали од АЛДЕ групата и екс белгиски премиер Ги Верхофштад, влезе во вербална идеолошка војна со Унгарецот Виктор Орбан. Што е исто така знак дека кампањата за ЕУ изборите во мај идната година е веќе започната.
За волја на вистината, кампањата ја почна Орбан. Унгарија направи видео во кое Верхофштад е обвинет дека сака да донесе во ЕУ мигранти.
Мигранти кои во главата на Орбан и неговата влада се тесно поврзани со терористичките напади. Од друга страна, Верхофштад е убеден дека на ЕУ и се потребни мигранти поради забрзаното стареење на европското население. Тој го обвинува Орбан за “агресивен напад врз либералните демократии”:
– Тој сака да креира илиберална држава а ние, Европјаните, не правиме ништо и не реагираме”, изјави Верхофштад и додаде дека е време да му се каже на Орбан дека тоа нема да го дозволиме.
Потоа, на почетокот на ноември европските либерали ја почнаа кампањата против анти-миграциската и анти-Сорос политика на Орбан. Тие ставија голем постер на еден камион на кој, покрај сликата на Орбан, пишуваше: “Прво ги зеде нашите пари, а сега сака да ја растури Европа.”
Вчера дојде одговорот на Орбан. Во кампања копирана од АЛДЕ, со постер на камион кој деновиве ќе почне да вози низ Брисел, портпаролот на унгарската влада вчера на Твитер напиша:
“Стотици загинаа во терористички напади во Европа од 2015 година. Но, Ги Верхофштад вели дека “Ние нема миграциска криза”. Тој и неговите европски либерали ја туркаат про-миграциската агенда. Тоа е лудо и тоа нема да остане без одговор. Нашата порака стасува наскоро на улиците на Брисел”.
Во септември, Европскиот парламент изгласа критички извештај против Унгарија. Во кој стои дека одредени настани во земјата претставуваат закана за основните европски вредности. Независноста на судството и медиумите и академската слобода се под притисок како и правата на малцинствата, мигрантите и бегалците.
Цел на нападите на Орбан е секој што во ЕУ крева глас против неговата политика. Па така и европратеничката од Зелените, Јудит Саргентини, која е и автор на овој извештај на ЕП во кој се бара суспендирање на правото на глас на Унгарија во ЕУ поради прекршување на европските правила, стана цел на силни кампањи на дискредитација во Унгарија.