Сите џамии во државата ги отвораат своите врати за верниците од 12 мај, одлучи Исламската верска заедница на вонредна седница. Во одлуката која НОВА ја објавува на македонски јазик, стои дека ИВЗ решавала, цитирам „по барањата на 13 те Муфтивста кои се засноваат на барањата на џематите(верниците) загрижени од невнимателните дејности на МПЦ кои ги охрабриле верниците од исламска вероисповед , Ријасетот на ИВЗ на својата вонредна седница да донесе одлука од вторник, 12 мај, џамиите да бидат во служба на верниците за обавување на колективни верски молитви“
НОВА, разговараше со скопскиот Муфтија Кенан Исмаили, кого го прашавме дали ваквата одлука е поттикната од МПЦ и вчерашниот собир во Струга. Тој беше дециден дека нема такво нештоо, дека нема никаков реваншизам, но потенцира дека на одлуката имале влијание верниците и верските службеници кои биле револтирани од верскиот собир во Струга и од некои случувања за Велигден и барале да се отворат џамиите.
„На оваа одлука влијание имаа многуте јавувања од верниците и верските службеници кои беа револтирани од некои случувања и бараа да се отворат џамиите. Ние почитувавме се како што наложија здравствените власти досега, ги затворивме објектите уште на 17 март, сега барем да ги отвориме во последните 10 дена во месецот на Рамазанските пости. Сите земји ги отворија денес, еве за џума, петочната молитва беа отворени џамиите во Србија и БиХ, но, ние ќе почекаме неколку дена да ги подготвиме верниците“, изјави за НОВА, Кенан Исмаили, скопски Муфтија.
На прашањето на НОВА, што значи колективна молитва и дали ќе се изведува во џамијата внатре или надвор од објектот, тој одговори дека ќе биде внатре, зедничка за верниците, но дека подготвуваат протоколи кои ќе бидат според стандардите во западните земји.
„Молитвите ќе бидат според сите протоколи во западните земји. Ќе бидеме дисциплинирани, ќе ги следиме препораките на Комисијата за заразни болести, во контакт сме со министерот за здравство и претседателот на Владата, денеска имавме и средба со министерот Филипче“. изјави Исмаили.
До 12 мај верниците имаат четири дена да се подготват за колективните верски молитви во џамиите. Тоа меѓудругото тоа ќе подразбира дистанца помеѓу нив, секој да си носи сопствена простирка од дома и да имаат заштита на носот и устата.