За времето поминато во притвор за случајот „Пуч“, Основниот суд Скопје два му досуди оштета на екс разузнавачот Зоран Верушевски од 42 000 евра за неосновано лишување од слобода. Верушевски и неговата сопруга беа 344 дена во притвор, откако во јавноста беше обелоденото масовното незаконско прислушување.
Верушевски ја тужеше државата откако СЈО го повлече обвинението и бараше оштета од 70 000 евра.
Обвинителството го покрена предметот „Пуч“ по обелоденувањето на аферата со прислушуваните разговори, а по прес конференцијата на тогашниот премиер Груевски на која тој обвини дека „прислушуваат странски служби преку домашни агенти“.
Верушевски, неговата сопруга и Ѓорѓи Лазаревски беа обвинети за шпионажа, а Заев кој беше четвртообвинет во случајот беше обвинет за насилство спрема претставници од највисоки државни органи. За истото дело беше обвинет и петообвинетиот Палифров. На сите им беше одреден притвор, освен на Заев, кому му беше одземен пасошот. Притворот им беше во декември 2015 година.
Верушевски беше обвинет од ОЈО и за неовластено поседување на службениот пиштол.
Како што рече судијката во денешната пресуда, Верушевски, претрпел душевна болка поради неоснованото апсење и држење во притвор 344 дена за што беше доставен и психијатриски наод.
Премиерот Заев кој 4 години по објавувањето на првата „бомба“ беше повикан како сведок во случајот „Трагет – Тврдина“ за незаконското масовно прислушување, рече дека очекува да се отвори истрага и за креаторите на случајот „Пуч“.
„Ако немало допрен глас досега, нека допре мојот глас сега до нив. Во тоа време, наместо Јавното обвинителство да го истражи ваквото незаконско прислушување, кршење на човековите права, тоа Јавно обвинителство се стави во функција на политиката, која во тоа време ја водеше извршната власт под раководство на Никола Груевски, го формира „Пуч“ за да може мене, господинот Верушевски, неговата сопруга, господинот Бранко Палифров, Ѓорѓи Лазаревски и Звонко Костовски, да нè гонат, а веројатно трагаа по планината и по децата на семејството Верушевски, конструирајќи монструозност“, рече Заев одговорајќи на новинарско прашање по сведочењето во „Таргет – Тврдина“.