Во роденденскиот број новинарките на дневниот весник “ВЕСТ” се соблекоа во борбата против ракот.
Со пораката- “Не покажувај ми ги мене, покажи му ги на лекарот”, утрешната роденденска насловна страна со 13 новинарки на “Вест” е повик и апел во борба против ракот.
За 13-ката со личен пример велат дека уште еднаш го потврдуваат она за што зборуваат сиве овие години – дека е добро да ги покажеш градите, но подобро е да му ги покажеш на лекарот.
Во уводникот на весникот, помошникот главен уредник Марина Костова пишува:
“Вест” не зборува гласно само за болестите кои ги засегаат жените. Во изминативе 13 години, без страв и срам зборувавме за женската сексуалност и ги пробивавме стегите на пуританството и малограѓанштината.
Но исто толку страсно и без страв, ги разобличувавме и ги критикувавме бруталните антиженски политики на сите наши влади и собраниски состави, со кои се атакуваше врз женските и човечки права кои се сметаат за цивилизациски придобивки.
“Вест” беше првиот кој во 2005 го крена гласот против обидот породилното боледување да се намали на 3 месеци, во 2006 бевме речиси единствените што го осудија ограничувањето на надоместот за породилно на две просечни нето-плати, во 2008 откривме дека дури и на сопругата на премиерот со месеци доцни исплатата на породилното, на почетокот на годинава ги откривме шокантните законски измени, со кои вработените жени со патолошка бременост, место 100 отсто, добиваат 70 отсто од платата за време на породилното отсуство, а жените со договор за работа на определено и стечајките остануваат без породилно.
Конечно, минатиот месец бевме единствените кои ги прозваа пратеничките и министерките дали ќе гласаат за законот за прекин на бременоста, со кој се ограничува правото на абортус, пишува Костова во уводникот на дневниот весник “Вест”, чија насловна е посветена на повикот на борба против ракот на дојка.