ЕВН Електрани веќе биле предупредени од алпинистите дека карпата е во нестабилна состојба. Заклучокот е дека карпата изгледа како да ја држи само триење, а ќе се набљудува и со дронови
Во кањонот Матка над браната има нестабилна карпа со тежина од 20 тони на висина од 100-тина метри. Таа може да се излизга во секое време и да падне во водата, но и да повлече со себе лавина од други карпи и камења кои би можеле да го загрозат ѕидот на хидроелектраната, алармираше денеска директорот на Центарот за управување на кризи, Стојанче Ангелов.
Алпинистите веќе ги предупредиле надлежните од ЕВН Електрани дека карпата е во нестабилна состојба.
– Таа е долга од 6 до 8 метри кубни и тежи 20 тони, се наоѓа на висина од 100 метри. Се работи за голема кинетичка енергија. Кога оваа карпа би паднала во браната има неколку потенцијални правци на движење. Бидејќи самата карпа се наоѓа блиску до сртот и врз правецот можат да влијаат повеќе фактори. Воедно, при лизгањето на оваа карпа можат да бидат предизвикани лавина од други камења и карпи што би паднале најверојатно во водата во близина на ѕидот, но ние дополнително сакаме да ги провериме овие податоци. Падот би бил во непосредна близина на испустот, бидејќи карпата се наоѓа на самиот врв од гребенот, изјави Ангелов.
Директорот на ЦУК додаде дека карпата може таму да остане уште 100 години, но должност на центарот којшто тој го води е да ги извести релевантните институции.
– Нема место за кревање паника, но ја известуваме компанијата со чамците да не го користат местото блиску до браната. Ризикот е многу мал, но сакаме да делуваме превентивно, да не се користи овој дел од ѕидот на браната, истакна Ангелов.Тој додаде дека од набљудувањето заклучиле дека карпата изгледа како да ја држи само триење, а ќе следува набљудување со дронови, по што институциите би излегле со конкретни мерки.
