Околу стотина демонстранти денеска се појавија на протест пред Основниот суд Скопје 1 каде што утрово откако беа приведени пратеници од ВМРО-ДПМНЕ, поранешни функционери и граѓани за насилните протести на 27. април, беа спроведени на распит во судот.

Пред почетокот на протестот кој го закажа ВМРО-ДПМНЕ за во 13.30 часот се појавија дваесетина демонстранти без транспаренти и со маици со обележја од ликот на „Ќосето“.

Се до 14:30 часот, на протестот не се појави ниту еден функционер на ВМРО-ДПМНЕ. Лидерот на партијата, Никола Груевски, пристигна неколку минути подоцна.

Демонстрантите сметаат дека актуелната власт е нелигитимна и дека приведените за насилствата во Собранието се приведени противуставно.

„Во Парламентот треба да се бара виновникот. Кој ги предизвика нередите? СДС со насилниот избор на претседател на Собранието, со насилно избраниот премиер кој сега на сите страни шета и ја распродава Македонија. Коренот треба да се бара во Парламентот. Дефектот ќе се отстрани само ако оваа Влада се преслуша и виде како дојде на власт. Таа дојде насилно и не е избрана…Македонија има код и род од Вселената и македонски код од Александар Македонски“, вели еден од демонстрантите.

Други се нашле таму за да дадат поддршка на други одредени лица. Еден од соговорниците вели дека пред Судот се појавил поради приведувањето на оперскиот пејач Игор Дурловски.

Демонстрантите, од кои голем дел од нив не сакаат да зборуваат пред камерите, велат дека тие ќе останат на протест додека е тоа потребно.

Најмногу пет дена трае процедурата за одземање на мандат на пратеник

Лидерот на ВМРО-ДПМНЕ, Никола Груевски на прес-конференција во меѓувреме рече дека приведувањето на лицата за насилствата во Собранието на 27 април е политички прогон и побара нивно итно ослободување.

– Бараме итно и безусловно стопирање на малтеретирањата, теророт и изживувувањето кое го прави СДСМ. Бараме итно пуштање на слобода на сите лица кои се опфатени со овој класичен политички прогон, рече на прес-конференција во партиското седиште Груевски најавувајќи дека ќе се приклучи кон учесниците на протестот.

Груевски оцени дека премиерот Зоран Заев и СДСМ, како што рече,  брутално удираат кон тие што мислат и делуваат македонски.

Информацијата за апсењето на екс-министерот Митко Чавков беше објавена утрово, кога тој по налог на јавен обвинител бил уапсен по отворена истрага за него за насилствата од 27 април во Собранието.

За време на крвавиот четврток Чавков беше директор на Бирото за јавна безбедност и раководител на штабот на МВР за протестите за Заедничка Македонија. Чавков досега не беше повикан на распит во Обвинителството за организиран криминал, туку во утринските часови беше затекнат и уапсен од полициските екипи.

Покрај него, приведени се уште 15 -тина, меѓу кои пратеници и граѓани кои се најдоа на 27 април во Собранието.

Помеѓу нив се и актерот Владо Јовановски, Горан Ангелов – Ќосето од Велес, пратеничката Жаклина Пешевска, пратеникот Крсто Муковски, пратеникот Љубен Арнаудов од Охрид и други.