Стотици демонстранти вечерва точно во 18 часот на булеварот „Климент Охридски“ во близина на владата, повторно се собраа на протест со барање на итна оставка и преземање одговорност на целата влада.
Граѓаните повторно беа спречени да протестираат пред објектот на владата, а пред полицискиот кордон Поставија платно на кое пишува „Збогум Никола“.
Тие извикуваа „Оставка“, a покрај барањето за одговорнoст на целата влада, бараа и итно ослободување на сите активисти притворени од 5.мај наваму, како и формирање влада за демократизација на институциите.
-По оставките на Јанкулоска, Јанакиевски и Мијалков е повеќе од јасно дека самоорганизираното автентично движење од страна на граѓаните кое започна од 5 мај, вродува со плод. Тоа нас не охрабри денес помасовно, посолидарно од кога било да ги повториме нашите барања, истакна активистот Анастас Вангели.
На дел од транспарентите пишуваше „Груевски оди си“, „Слобода за студентите“, „Македонија се сака со оставки“ и „Три ластовички не ја чинат пролетта“ алудирајќи на оставките на Јанкулоска, Јанакиески и Мијалков, кои тие ги поднесоа вчера.
Денешната рута на демонстрантите од „Климент Охридски“ продолжи кон Основниот суд 1 во Скопје, каде демонстрантите побараа итно ослободување на студентите приведени на 5 мај.
Пред колоната граѓани се обрати студентот Мариглен Демири од Студентскиот пленум кој му порача на премиерот Груевски, „Николче нема да те оставиме на мира, се’ додека не ги ослободиш нашите другарки и другарки“.
Оттаму, граѓаните се упатија кон Собранието,каде говор одржаа повеќе активисти и студенти.
-Драги сограѓани, можеби оваа борба ја почнавме на различни фрегментирани фронтови, како што беше студентскиот, работничкиот и средношколскиот. Благодарение на нашата граѓанска и политичка свесност застанавме обединети во отпорот против сите оние кои не работат во нашите цели и интереси, туку обратно од нив, порача студентката Марија Грубор.
По два ипол часовен марш протестот заврши пред Собранието, откако претходно граѓаните уште еднаш потсетија дека ќе продолжат да протестираат секој ден во 18 часот, се до целосно исполнување на нивните барања.