Претседателот Стево Пендаровски го прими првиот човек на Европскиот совет Шарл Мишел, кој претпладнево допатува во еднодневна посета на Македонија.
На средбата се разговараше за актуелните политички случувања во Македонија, за предизвиците во однос на европските перспективи со кои се соочува на земјава и за францускиот предлог за почеток на пристапните преговори со Европската Унија (ЕУ).
Претседателот Пендаровски ја карактеризира посетата на Мишел како показател за посветеноста на ЕУ и го информираше за текот на широкиот консултативен процес кој се води во однос на францускиот предлог, како и за атмосферата во нашето општество по тоа прашање.
Двајцата претседатели се согласија дека прифаќањето на францускиот предлог ќе овозможи отворање на првата фаза од пристапните преговори, со што фактички ќе се одблокира ЕУ интеграцијата на нашата земја. Покрај ова, отворањето на првата фаза ќе претставува натамошен поттик за напредокот и просперитетот на Северна Македонија, но ќе има позитивно влијание и врз севкупните состојби на Западен Балкан.
Соговорниците разменија мислења во контекст на загриженоста која постои кај граѓаните во однос на идентитетските прашања, за што претседателот Пендаровски потенцираше дека македонскиот јазик и идентитет мора да бидат почитувани и гарантирани од страна на ЕУ.