Со тапани, тенџериња, тави, со свирежи и транспаренти со ликот на премиерот Груевски, илјадници демонстранти денеска уште еднаш со протестен марш му порачаа на премиерот Никола Груевски веднаш да си поднесе оставка.
Протестот започна во 18 часот пред Владата на Република Македонија, а граѓаните маршираа до зградата во која живее премиерот.
Демонстрантите за време на протестниот марш скандираа „Нема правда, нема мир“ и „Оставка“, а како колоната се приближуваше до домот на Груевски, така бучавата стануваше се погласна.
Пред зградата во која живее премиерот, демонстрантите ги пречекаа кордони од полицајци и припадници на специјалните единици.
На импровизирана бина на улицата , пред присутните се обратија активистите Васко Лазаревски, Петрит Сарачини и портпаролот на СДСМ Петре Шилегов.
Сите тројца во своите говори му порачаа на премиерот што побргу да ја напушти Владата и да го спаси народот од беда.
-Цел свет слуша за тие политички бомби кои пукаат Македонија. Сите светски медиуми дознаа дека овде се живее во режим кој забрзано оди кон диктатура. Овде имаме Влада која ги узурпира последните неколку избори и на таа сметка е на власт. Сите слушнаа што се случува во Македонија, царот е гол. Тука сме, нека слушне, народот доаѓа по своето, рече пред присутните активистот Васко Лазаревски.
Активистите потенцираа дека граѓаните протестираат со чисти и празни тенџериња и тави бидејќи„ народот е чист, но трпезите им се празни“.
-Излези Николае на терасите од твоите четири стана, да видиш со народот твој што стана. Излези Николае на твојата тераса, да си ја видиш ограбената, понижена, уништена македонска раса. Излези Николае да ги видиш нашите празни трпези, нашите празни тенџериња и тави, да видиш што направи од оваа Македонија. Излези Николае-Ромео со твоите Џулиети, Али Ахмети и Мендух Тачи да видиш дека додека ти наводно даваше субвенции, селата се испразнија, луѓето избегаа во градовите, а сега бегаат и оттаму. Излези да видиш додека ти ги градеше оние споменици, народот трпи за леб, му порача активистот Петрит Сарачини на премиерот.
-Твоите комуњари, индијанци, човечиња, дојдовме да ти кажеме готово е Никола. Овде дојдоа горди граѓани, активисти, Македонци, Албанци, горди граѓани на Република Македонија. Дојдовме овде со чисти тенџериња и тавчиња затоа што ние сме домаќини луѓе. Дојдовме Никола да ти го кажеме она што твоите лигави полтрони не смеат да го изговорат – готово е Никола, заминуваш! Спаси го овој народ, иднината на оваа држава. Денеска поднеси оставка и завршува кризата во Македонија, рече портпаролот на СДСМ Петре Шилегов.
По получасовниот граѓански бунт пред домот на Груевски, граѓаните повторно маршираа назад до Владата на Република Македонија, која изминатиов период е збирно место за низа антивладини протести, но и место каде граѓани, членови на опозицијата и активисти веќе 39 денови спијат во импровизираниот Камп на Слободата пред Влада и бараат оставки од целата власт, но и одговорност за сторените дела кои преку аудио снимките ги обелодени опозицијата.