Видео обраќање на премиерот Димитар Ковачевски по учеството на Минхенска безбедносна конференција.
Претседателот на Владата на Република Северна Македонија Димитар Ковачевски со видео порака го сублимираше и оцени учеството на владината делегација на годинешната Минхенска безбедносна конференција која оваа година по 58 пат собра над 30-тина шефови на држави и влади и највисоки членови на влади и претставници на најугледните меѓународни организации.
Ковачевски вели оти на Минхенската безбедносна конференција годинава, Северна Македонија учествувала како рамноправна членка на НАТО и тоа во исклучително турбулентни времиња, а средбите кои ги имал македонскиот државен врв со стратешките партнери биле фокусирани на предизвиците кои претстојат на полето на европската и светската безбедност.
„Минхенската конференција пред сѐ, јасно ја демонстрираше целосната и силна обединетост на сите НАТО и ЕУ сојузници и партнери, и го прецизираше фокусот кон заедничко надминување на сите предизвиците поставени пред Европа, САД и светот. На средбите со највисоките претставници на НАТО, ЕУ, Соединетите Американски Држави и со сите останати, ја потврдивме нашата определба за зачувување на безбедноста и стабилноста, како на регионот, така и во светски рамки. Уште еднаш добивме едногласна и моќна поддршка од сите сојузници и затоа остануваме и понатаму силно посветени на евроинтеграциите, нашиот европски пат е трасиран и јасен“, рече премиерот Ковачевски.
Новиот пристап и енергија во разговорите со Софија, според Ковачевски, бил препознаен како правилен и по него треба да продолжиме за конечно да ги надминеме разликите.
„Интеграцијата на Северна Македонија во Европската Унија значи започнување на нова ера на економски напредок, стабилност и развој за нашите граѓани. Од овој пат не смееме да се откажеме. На средбите уште еднаш ја потврдив нашата позиција дека Берлинскиот процес останува приоритет, а на иницијативите како што е „Отворен Балкан“ гледаме како на нов инспиративен поттик за регионалната соработка. Горди сме на остварувањето нашата стратешка цел, целосна интеграција во НАТО и остануваме посветени на реформите и дијалогот кој ќе ни обезбеди европска иднина“, вели Ковачевски во видео обраќање.