Во пресрет на изборната кампања, народниот правобранител Иџет Мемети упати апел до сите учесници во изборниот процес да се воздржуваат од инволвирање на децата во изборните кампањи.
Тоа, како што истакнува Мемети во денешното соопштение, значи одбегнување на сите обиди за евентуална манипулација, како и злоупотреба на децата за партиско-политички цели.
– Апелот го упатувам со цел да не се повторуваат случаите од минатите изборни циклуси во кои децата беа користени во политички настани, спотови и билборди. Исто така, потсетувам дека злоупотребата на децата за политички цели се смета за кршење на нивните слободи и права, а со тоа и прекршување на сите меѓународни и домашни правила за заштита на правата на детето, вели народниот правобранител.
Праксата од минатите изборни циклуси покажува дека апелите на Мемети не се залудни. Како тоа изгледаше на локалните избори минатата година? Видео сторијата на НОВА објавена минатата година илустрира до каде се оди во борбата за гласови: ниту децата се поштедени, ниту пак постарите, а во игра беа и државните ресурси и личните податоци на граѓаните. Погледнете ја сторијата.