Министерот за внатрешни работи Оливер Спасовски најави пријави против лицата кои ги оштетија темелите на крстот што треба да се гради во скопски Бутел. Тој исто така вели дека не се вистините тврдењата дека полицијата не реагирале навреме и соодветно.
– Полицијата постапуваше согласно со правилата и сметавме дека најважно од се е да го зачуваме мирот и стабилноста и пред се, да не овозможиме да имаме ескалација на судирите. Најлесно е да го запалите огнот, меѓутоа најважно од се, денеска имаме превенција и да не дозволиме да имаме ескалација на состојбите во Република Македонија. Денеска тоа е реалност, и јас и граѓаните на Република Македонија се задоволни заради тоа, рече тој.
За протестите пред МВР Спасовски рече дека никој не пријавил протест но дека секој има право да протестира.
– Јас мислам дека после една ваква мирна разврска, после висината и одговорност на којашто беа и политичките субјекти и сите коишто учевствуваа во овој процес нема место да се протестира пред Министерството за внатрешни работи. Затоа што на таков начин се понижуваат полициските службеници коишто најпрофесионално си ја извршија својата задача во овие тешки моменти за Република Македонија и општина Бутел.
За избирачкиот список Спасовски рече дека се уште не може да се каже што точно сега се наоѓа во избирачкиот список бидејќи тоа е работа на Државната изборна комисија.