Непосредно пред почетокот на денешниот средношколци марш во Битола, учениците успеале да снимаат како наставничка и директорка во битолското медицинско училиште „Д-р Јован Калаузи“ ги одвраќаат своите ученици да не одат на протестот.
Од видеото кое се појави на социјалните мрежи, а зад кое стои Средношколскиот Пленум од Битола се гледа како вработените од училиштето им велат на своите ученици дека ако се појават на маршот, после да не бараат примерно поведение на крајот од годината.
НОВА денеска разговараше со секретарот на училиштето кој вети дека ќе и пренесе на директорката да стапи во контакт со нас. Сѐ до објавување на текстот, директорката на училиштето не се одзва на нашиот повик.
И покрај притисоците средношколците велат дека денешниот марш бил успешен. Околу 400 средношколци од повеќе средни училиште го кренаа гласот против реформите и со марш укажаа дека не отстапуваат од своите барања.
Маршот започна од средното медицинско училиште „Д-р Јoвaн Кaлaузи“, продолжи по Широк Сокак и булеварот „ 1 Мај“, а заврши пред општината во Битола, каде претставници на средношколците се сретнаа со координаторот за образование во општината.
Тие договориле идна средба на која Пленумци официјално ќе ги достават барањата и добиле ветување дека нивните аргуемнти ќе бидат испратени до ресорното министерство.
Средношколскиот пленум бара укинување на екстерното тестирање и враќање на стариот модел на државна матура.
-Маршеви, како во сите градови, така и во Битола се против лошите реформи во образованието, нашите барања се јасни, и доколку немаме исход ќе видиме да преземеме наредни чекори. За професорите кои не нѐ поддржуваат до негде е и оправдано бидејќи и они се соочуваат со притисоци, но, од друга страна сепак и овие реформи и те како ги засегаат и нив, велат од Средношколскиот пленум за НОВА.
Учениците денеска добија поддршка од студенти, но и основци и наставници кои се одважија на маршот.
Освен во Битола, периодов маршеви се организираа во Скопје, Велес, Куманово, Кочани, Ресен, Дебар, Делчево, Македонски Брод, Тетово и други градови низ земјата.
Директорката Ниќиќ-Десановска: Никогаш во животот никому не сум се заканила